البارحة ما زان ليلي ولا طاب
أصبر وأصبر خاطري واتحايل …
شيخ الشباب انصاب والقلب منصاب
والضيق بانت له بوجهي دلايل
لا باس يا شيخ له العز جلباب
طهور يا شيخ الفخر والفعايل
.. مكانتك يا حر في راس مرقاب
ما دمت نسل املوك من نسل وايل
طيحتك هذي مجد يحسب له احساب
زكاة فعلك في ظهور الأصايل
كتفك يشيل احمول جيله ولا هاب
لو زادت بعينك كبار الهوايل
توقف لها يا ذخر ربعك والأصحاب
وقفة جبل ما هيب وقفة تمايل
أبهرت هالعالم قريبين واجناب
وفتحت لك في مركز العز فايل
سطرت تاريخك بطولات واصعاب
ومالك عن المركز الأول بدايل
كلن يحيي موقفك حب واعجاب
جمهورك اللي في جميع الوسائل
رسایلن ترسل من قلوب الأحباب
ونشوف حبك في جميع الرسايل
الله كتب والعبد يبذل بالأسباب
وجعله فداك الكون والهم زايل …
والدة سمو الشيخ ناصر بن حمد آل خليفة
